Kryetarja e LSI-së, Monika Kryemadhi në një takim me Komitetin Drejtues Kombëtar dhe gratë e kësaj force politike, në Tiranë tha se sa më shumë kryeministri Edi Rama të zgjasë vuajtjet e shqiptarëve, aq më shumë shqiptarët do ta ndëshkojnë atë.

“Ne me fuqinë e grave, nuk do të lejojmë pazare në kurriz të shqiptarëve. Këtë gjë shqiptarët e kanë kuptuar, duke qenë prezentë nëpër protestat tona. Pjesë më e madhe e komisionerëve të LSI-së do të jenë gra, dhe kjo sepse gratë as nuk shiten, as nuk blihen. Aty ku Edi Rama nuk e pranon ligjin, mos çuditet kur shqiptarët ta përdorin kanunin. Sa më shumë të zgjasin vuajtjet e shqiptarëve aq më shumë do ngrihen shqiptarët”, tha Kryemadhi.

Sipas saj, gratë e LSI-së janë elementi më luftarak që ka LSI-ja, dhe ato janë motivimi i të gjithë iniciativës.

“Ne duhet të qëndrojmë. Këtë po ju them juve se gratë janë ato që luftojnë dhe edukojnë fëmijët për të ardhmen e shoqërisë, edhe në politikë gratë i japin ngjyrë, i japin vlerë politikës. Misioni ynë është të luftojmë për fëmijët tanë”, tha Kryemadhi./ata/